ياليل تمـلاك القصص والتماثيل
والمخـتلف منها عــلينا تشـابه
سمحت من باب الطرب والتعاليل
وانا استميـحك للسـهر والكتابة ..
سمـعت ما قالوا وكنّـيت ما قيل
ياليت تمطر من خـفوقك سحابة
ارض المعاني تنـتظر عارم السيل
ظـميان الاسـتفهام منك الاجابة
بشتك ســوادٍ فيه سطوة رياجيل
وانت الظلام اللي سرتك الذيابة
خاويت فرسانٍ على ضمر الخيل
تملا كــفوف البـيد قدر ومهابة
منها شديدٍ يضرب الضلع ويميل
يمكن يجي بالضلع نوع انقلابة
ســوالفٍ غنّـت عــلينا مـواويل
فيها الفخر والمجد سجع الخطابة
يذكر لها عــنوان فـوق التفاصيل
الطايلة ، والمعرفة ، والنـجابة ..
وانا على حــضرة شهادتك ياليل
مغني خـيالي عن لحـون الربابة
روابــعي لا صــدرت طــير ابابيل
تجلا الخــطا قبل استبـيح ارتكابه
ما ضيرت روس النشاما على الميل
مهما طغى رمح الدهر في صوابه
بعــد الكلام اللي نزل فـيه جبريل
والثابت بفـعل النبي والصـحابة
ماني مع التـاريخ مـنحاز بالحيل
لا اوحيت شي من العجب والغرابة
هو صفحة تكتب وتقرا على الجيل
صــوتٍ مـثير وغــايته باستجابة
لو ينطق الموتى تموت الاباطيل
ونشوف قصر المجد عوّد خرابة
