قصيدة للشاعر عبيد عبدالله ابن داموك بمناسبة الذكرى الثالثة لمبايعة ولي العهد صاحب السمو الملكي الأمير محمد بن سلمان بن عبدالعزيز حفظه الله :
ابشر بعزك وبشر من هقا فينا
يااميرنا اللي ينومس من تهقوابه
يالراسي اللي على الراسي تحلينا
وتقول شعبي سوات طويق وهضابه
ايوالله إنك ليا ناديتنا جينا
للروح دونك يابن سلمان جلابة
حنا مضامين قاصينا ودانينا
طاعة ولي الامر والرب وكتابه
ماننثني عن هدفنا ليا تعزوينا
مامثلنا في نهار الحرب حرابة
في حومة الوغي لامنا تناخينا
نَسُرُّ صدر المليك ونكسب اعجابه
تشهد لنا أرض الكويت وطيب ماضينا
يوم إن صدام باع العرف واصخابه
ويوم إن بحرين ابن عيسى تنادينا
جينا ماصرنا من العدوان هيابة
ويوم إن بحر العرب لد النظر فينا
نهار سابي سبا يشعب له اركابه
جينا لدار العرب و أول عزاوينا
أنا اخو نورة نقوله وانتنخّا به
لعيون سلمان ومحمد تواصينا
أما نموت أو نبيد ايران واذنابه
ومن دون مصر العروبة قد تفانينا
يوم إنها بخنجر الاخوان منصابة
وعن ليبيا والله إنا ماتوانينا
يوم إن دوغان قام يفتل أشنابه
ومن دون لبنان والبصرة تحدينا
الفارسي والخسيس اللي تعزوا به
لاقلت حنا ما احد يجهل لاسامينا
سلمان ومحمد أهل السيف وانصابه
8 تعليقات
مناسبة غالية وشاعر علم نظم أحاسيسه ومكنونات نفسه بصدق حفظ الله بلادنا ووفق قيادتنا للخير والرشاد .
صح بوحك واعتلى شانك مناسبة عزيزة تستحق أن تنظم فيها القوافي حفظ الله ولي العهد وأمد في عمر والدنا سلمان الحزم وحفظ بلادنا من كل سوء .
صح السانك واعتلا شانك
كلمات فيها معاني ساميه
تطرب لها الأسماع من شاعر
مبدع عودنا على المعاني
الجميله والكلمات الرايعه
مع تحيات اخوك
(ابو هباش)
بيض الله وجهك وصح لسانك بحر شعر ومرجله يبن داموك.
والوطن يستاهل اكثر
ابدعت فامتعت لله درك من شاعر
ونعم بااميرنا ابو سلمان بيض الله وجهك
الشعب السعودي بلسان واحد الاوهوشاعرنا المبدع عبيد الداموك الذي ترجم مشاعر وولاء الشعب تجاه ولات أمره وصاغ لنا هذه الدرر لنهديها إلى حكامنا حفضهم الله فشكرآ لشاعرناالمبدع
عزالله انك صدقت يالداموك
ان هذا خافي كل سعودي وعادتهم
منذو توحيد هذه الدولة على يد المؤسس
وستبقى للابد كلنا محمد نعم نعم ????