بعض البشر !!

من راح واقفى ما نشدنا على وين

اللي يروح .. براحته ما نرده

حنا فقدنا فـ اول الوقت غالين

وفراقهم ما بيح الوقت سده

ماهو على شان الضعوف المساكين

بمسك صدر ثوبي وأشده واقده

مرت بي الدنيا على الشين والزين

وماشفت مع مر الليالي بعده

بعض العرب لو تسكنه داخل العين

يطيح ما ياخذ مع الوقت مده

بـ ادنات موقف تكشف الوضع ويبين

لا بارك الله فيه .. ولا عاد وده

وبعض العرب هرجٍ يغيره هالحين

ويجيه هرجٍ عن ما قرر يصده

يعني على ما قيل مرخي للأذنين

هذا يفقي به وهذا يرده

وبعض العرب كنه من أقصى المعادين

لو يشبه إلـ عدّك : ليا عدّ : عده

إمن الحسد والغل سنّ السكاكين

مافيه شبرٍ فالقرايب ما قده

وبعض العرب والف على المنطق الشين

لو تنطق بعذب الحكي ما يشده

مأسس لسانه على ساسٍ هوين

وابناه بهزال السوالف يهده

وبعض العرب عاري ولو يلبس الدين

الدين فعل وقول صدق وموده

ورجلٍ تكسبّـه .. يغش المسلمين

لا شك صيده عن مراميه لده

وبعض العرب نمام ويفرق اثنين

هذا يعبي به وهذا يمده

ما يحس بالراحه ليا شاف ولفين

يرتاح لا شاف الخلاف ويشده

وبعض العرب ماشي ولا يدري منين

والتايه من ( أمسه ).. لا ترجيه ( غده )

غادي مثل غيره ليا عدّ غادين

يبغى يكد ولا يعرف المكده

وبعض العرب غارق ولاعبّه الدين

وخرومه بزودٍ .. ولا خرم سده

ياخذ حقوق الخلق  والنيه يشين

والشين ما تعينه ( نواياه ) ضده

ومن يتكل بالله .. له الخالق يعين

ولا خاب من يرفع إلى ( الرب ) يده

وبعض العرب حطه على كفك يمين

حرٍ على شهب المواقف تهده

ما تضام في قربه ولا تشكي البين

إحزام لا جات المواقف تشده

وللي سمع قولي بقفل بشطرين

مضمونها سابق ولا فيه جده

الصاحب الطيب ولو من بعيدين

اوصيك من بين الرياجيل بده