اشمخي ياديرة العز يادار الكرام
دامك انتي شامخة كل ابونا شامخين

غردي يادارنا والبسي ثوب السلام
اشعلي شمعات نورك لكل المسلمين

اصعدي من فوق نجم الثريا والغمام
أبلغي حد السما فوق كل العالمين

نحتفل تسع وثمانين عامٍ بعد عام
بالرخا والأمن يادارنا عشتي سنين

فيك مسجد سيد الخلق والبيت الحرام
وفيك حكامٍ يقصون روس المعتدين

وفيك شرع الله على منهج السنه يقام
الله أكبر تنحني روسنا له ساجدين

كلنا نفداك يادارنا ماهو كلام
انشدوا من خاننا ويش حنا فاعلين

دون حدك نتعب الرجل ونسل الحسام
البقى ما دامنا في حدودك واقفين

وحدك صقر الجزيرة ولبسك الوسام
لين صرتي في عيون العرب حصنٍ حصين

كملوا دربه عياله عزيزين المقام
الملوك اللي على نهج ابوهم سايرين

دام حنا تحت حكم الامام ابن الامام
ابشري بالعز يادار والنصر المبين

ياملكنا كلنا سيف في وسط الحزام
انت تأمرنا وحنا نجي لك طايعين

انت بيديك المسيرة وبيديك الزمام
بالشدايد قلب قاسي وفكر محنكين

سيدي سلمان تاج العرب شرقٍ وشام
بالدها والحلم لينت روسٍ ماتلين

جنبك محمد اليا صارت الدنيا عسام
جاهزٍ وقت المهمات سيفٍ باليمين

ياولي العهد قود القوافل للأمام
كلنا تحت الأوامر ولامرك جاهزين

لو تودينا فلسطين رحنا بانتظام
والله ان القدس نملا سماه مكبرين

سربنا للقدس نكسر خفافيش الظلام
نستعيده من يدين اليهود الغاصبين

والسلام ختام واختامها مني سلام
ختمها مني صلاتي لخير المرسلين