يا شعبه اسمع دام خاطرك مشروح

باليوم هذا، واعتبرها وصيّة

من واحدٍ يغليك من غير مصلوح

ويعشق هوىٰ وتراب نجد العذية

أنا ادري انك للوطن ترخص الروح

ومضرب مثل للامة اليعربية

شعبٍ وفي.. ما ضلله هرج مملوح

ولا زجّ فيه اعداه للفوضوية

لكن غلاه يحتّم اهديه منصوح

وحرصي عليه وغيرتي والحميّة

وانا صريح وقلبي كتاب مفتوح

ومشاعري للناس ما هي خفيّة

يوم الوطن.. تذكير بانجاز وطموح

وتجديد عهد بصدق واخلاص نيّة

ما هو مجرد فرحة وصدر مشروح

هو يوم وحدة وانتما للهوية

وذكرىٰ سواعد شيّدت عز وصروح

حنا بسببها نعيش عيشة هنية

نعيش بامن ونعمة وخير وفسوح

في ظل قادة منصفة للرعيّة

آل السعود.. اللي جنوا مجد وفتوح

بالسيف الاجرب والعقول الدهيّة

يوم القبايل بين طارح ومطروح

يمنىٰ "معزّي" وحدتهم سويّة

صرنا وطن آمن به العيش بحبوح

خالي من التفريق والعنصرية

شعب متلاحم والخطا غير مسنوح

ودستوره القرآن باصغر قضية

في وقت شفنا فيه تهجير ونزوح

وبلدان دمّرها فتن طايفية

وشعوب راحت بين شارد ومذبوح

الله لا يبلانا بذيك البليّة

وحنا بوطن باركه قدّوس سبّوح

وشرّفه بالكعبة ومسجد نبيّه

واجب نصونه والعذر غير مسموح

مثل الشرف والعرض.. واكثر شوية

من راده بفتنة عسىٰ روحه تروح

قبل الوطن لا يلحقه منه سيّة

يفداك دمي يا بلد وامي تنوح

ولا اشوفك تمر بظروفٍ عصية

أقولها لين يغدي الصوت مبحوح

ويشهد على ما قول رب البرية

اني سعودي الدم والقلب والروح

لو فاتني التجنيس والتابعية

الشاعر: يوسف الحسن - الرياض