ياللي تكلم ف آخر الوقت وتغير
لـو الزمن يرجع ماشنيت غاره
مابنت لـيـن اللي تعثر به السير
طاح ،، وزمانه بان فيه انكساره
روّح زمان اللي يقود الطوابير
وجانا زمان اللي يضيع قراره
وقتٍ كثر به راعي الشر،، والخير
ما عاد له بين المخاليق شاره
من دون نقصٍ فالرجال المناعير
القلب شـاف اللي يزود شراره
وقتٍ تحلق به صغار العصافير
والحـر بين الناس ضاع اعتباره
وقتٍ معتم به عجاج ومعاصير
والناس ضيعها مطاير اغباره
يصغر به كبارٍ ويكبر به صغير
ويشوف فيه الرجل ذل وحقارة
ملعون ابو مالٍ ينزل مشاهير
وقفوا على راس السنام بجداره
روس الرجال مجبرين المكاسير
ومطوعين اللي براسه نعاره
يوم الرجل بـ افعاله يبان للغير
لـو كان مايملك لشربه غضاره
وملعون ابو مالٍ يعلي مخاسير
ماشيدوا بـ الطيب كبر الزباره
صيداتهم وقت الهداد بتصاوير
صيدات بسٍّ وأجزل الصيد فاره
والمجتمع ب أسباب حبّ الدنانير
حطوا على الرعيان بشت الإماره
عقاب ابو سبته
(
(
