ياللي بعرض الناس دايم تخوضون
ماخفتم المولى شديد العقابي

بأعراض خلقه تمدحون وتسبون
خالفتم الفطره وكل الأدابي

اتصنفون الناس نوب وتهزون
واللي يقول احسن من الناس هابي

الناس مثل الناس صاحي ومجنون
الجنس واحد والمصير الترابي

وكن البشر يخطون وأنتم ماتخطون
اخطيتم الحكمه وقول الصوابي

الناس يخطون الصواب ويصيبون
مافيه مخلوق نضيف الجنابي

إلا الرسول اللي لذكره يصلون
عليه صلوا عد رش السحابي

ولاني بناشدكم عن اللي تقولون
لآكن لاتنسون يوم الحسابي

يومٍ على رب الخلايق تعرضون
وحان الجزاء الفعلي ووضع الكتابي

اقراء كتابك كل ماقلت مظمون
من أشرقت شمسك ليوم الغيابي

ولاتسئل اللي في طريقك يمرون

اقرأ وتلقى بالكتاب الجوابي

ومن أول الصفحه تراكم تعرفون
اما نعيم الدار وإلا العذابي

ويالله ياللي لك عبادك يلبون
تغفر خطأ عبدا عن الذنب تابي

الشاعر / محمد مزيد بن هرسان