من شذّ عن ربعه الادنين بالصدّة
من جور الاقصين لايشكي بني عمه
يفزع له الضيم من همه ولايسدّه
رضى على القاع يوم انه على القمة
ان حدّك الي رضى بالبعد لاتحدّه
وليا رضى بالشتات ابعد ولا تلمه
لا اقبل عليك الخطأ حذراك لاتردّة
ادفع بحلمك عليه وشوم عن ذمه
ارخ الحبل لا تصعّد شدك بشدّه
شدّك على شدّته يعقب لك مطمه
وسط المجالس تبسم له ولاتضدّه
لايارد البير عدوانك على جمه
هرج القفى بالرفيق ان كان ماتودّة
ناب العدو لو يضره نايشك سمّه
يصغر بعينك رجل لا بيّح ابسدّه
ادنى خطا يلفعه يشكي عليك امه
افسح مجال الرجوع الباب لاتسدّه
يمكن يرد المقفي يخلف اليمه
عن غيره من البشر في حاجته بَدّه
العرق واحد ودمك خالطٍ دمه
وليا بغى وقفتك دسم له المَدّة
وليا بغيته يجيك امشمرٍ كمه
اول صفوفك يجي لا حانت الشدّة
في مقدم الصف ياقف عاصب العمه
بيت العلاقة مع الاقراب لاتهدّه
يبتٍ يعز الرجل ينصاه عن همّه
انشد عن احوالهم لاطالت المُدّة
اثبت على امواصلك لاترخي الهمة
سيف القطيعة على الارزاق لاتحدّه
الوصل غيثه عليك ارزاق ملتمه
(
(
التعليقات 1
1 pings
عوض الحربي
23/06/2019 في 10:29 ص[3] رابط التعليق
صح لسانك يابو حسين الله يوفقك
افسح مجال للرجوع الباب لاتسده