لا والله الا غيم الجو وامطر ..

غيم سماه وساق قلبي نسيمه

واخيل براقه ومزنه تهصر ..

على هوى نفسي كثافة غيمه

ياخالد المرسال وشبه توخر ..

واهجوس قلبي فوق قلبي مقيمه

من عصر أنا جاعان لكن اتصبر ..

صبر اليتيم اللي وليه يتيمه

يالله ببيت صاحبه فيه يشكر ..

رجل كريم ومن سلاله كريمه

ولا شافنا رحب تراحيب وأكثر ..

جينا ضيوف ولا عزمنا عزيمه

حط الحطب فالنار حتى تكسر ..

حتى برز جمره وحمر هشيمه

ودله على المحماس والبن الاخضر ..

في حمسته ماتغتشيه الظليمه 

ظل يحمسه لين بنه تشقر ..

حتى قنعت بحمسته وتعليمه

لا محرقن بنه ولا هو محمر ..

دم الغزال لا اندفق من صميمه

مع زعفران وهيل والعود الاسمر ..

في وارد الرسلان ماهي قديمه

وكبش من المعلاق قام يتهصر ..

من نسل حيل مربيتهن حليمه

لا شافت المحتاج قامت تجبر ..

تمدح غنمها جعلها الثليمه

قال اطلبي والأمر كله ميسر ..

العمر فاني والليالي مقيمه

خاله وابوه ألهم فعايل تذكر ..

وألهم على العادات شيمه وقيمه

وهوه بعد بافعالهم قام يفخر ..

من عقبت حلياه ماهي عقيمه

يالله عسى دار الكريمين تمطر ..

وتسني ديار أهل الردى والنميمه

بيوتهم دايم هجافه بها الذر ..

باطرافها مافيه ريح الوليمه

رجالهم بين المخاليق يفتر ..

يومي براسه مثل راس البهيمه

وإلى حصل عرماشةً قام يزمر ..

حصل عشاه وقال جبت الغنيمه

حليلته زايد على كبدها المر ..

تهل دمع العين وهي هميمه

شافت فعول سنيد وعبيد وعمر ..

تعلمت وهي من أول غشيمه

قالت حرام لمثل هذا اتعطر ..

ان ماهدمت مبناه ماهي سليمه