ياصاحبي يوم الظروف اجمعننا
أبيك بالديوان عندي تفوتي
تعطيني الأخبار على قهوتنا
وانا عليك اطرح معاني بيوتي
اليامتى وأيامنا مشغلتنا
نوعد على بعدين حتى نموتي
الأوله راحت وعنها سكتنا
والثانية ماعاد عنها سكوتي
من يضمن الأيام لو فرقتنا
مامعك من غيب الليالي ثبوتي
ياما خذت منا وياما عطتنا
وياما خذت عنا بياض السبوتي
حتى عن أوقات الصلاة أشغلتنا
ياما علينا طوفت من اوقوتي
ومن الطمع في بعضنا كرهتنا
اخفت وجيه أهل الاوجار البشوتي
اللي مراتع ذودهم منطقتنا
على المطايا قبل دور الفروتي
ويوم الحياة ظروفها و أوزعتنا
كبرت هموم عقاب من حب نوتي
لو المنافق مايبي مصلحتنا
هذا يثبتله وهذا يشوتي
عيت تزيح أمجادنا معضلتنا
لو اصعد المشراف واجهر بصوتي
الليل غدرا والضواري كلتنا
والشجرة الخضراء ورقها محتوتي
عن مايثير الشك ماضللتنا
مالت على رأس اللئيم الشموتي
الي عبث في محتوى مكتبتنا
في حضرة مشرف ونضير بوتي
الله يديم الأمن في مملكتنا
منها يكفيني شرابي وقوتي
يالله يلي فيك تبقى ثقتنا
ياحي يلي دايمٍ ماتموتي
ياعالماً سياتنا وحسنتنا
يامظهراً ذنون من بطن حوتي
يارب تحسن باللقاء خاتمتنا
لاوزعت بين العباد الكروتي
الشاعر عايض صالح الشويلعي