على صدى حزم الجنوب تزلزل رعود الشمال
و الحق نورِه مثل نور الشمس وضّاح و جلي
ما عند سلمان اخو نوره للعدا كثرة جدال
ما عنده الا موقفٍ حازم و نارٍ تصطلي
خلّى مجوس ايران تعرف بالمدافع و السلال
إن "الولي الله و لا غير الله الوالي ولي"
توّبهم برعد الشمال و قال حنا اهل القتال
مثل ما توّب زمرة الحوثي و بن صالح علي
صوت المدافع و امهات الريح من فوق الجبال
خلّى هدير اخصامنا .. كنّه صفير البلبلي !
حوّل عليهم راجمات الموت في سود الليال
ما هي بجلمود الصخر .. جلمود موتٍ من علي!
أقدم على رايِه ما قال اسمع عدوي ويش قال
و اقدامته تبرد عليها كبود و كبود تغلي
يا ابو فهد قدنا لحضن المعركة .. حنا الرجال
اللي بنادقهم على اخصامك شهابٍ مرسلي
ليا خذينا الشور من راسك قدمنا باي حال
و الله ما نرجع لين عدوانك يذبّون الخلي
يا ابو فهد راية وطنا في يدك أصدق مثال
إن البطوله مهدها مهد الكتاب المنزلي
حنا ظلال اللي من اخصامه ما يلقى له ظلال
بلادنا كم آوَت مشرّد و عانت مبتلي
يا دارنا عشتي منارة للأمن و الاعتدال
و على طريق المجد يا راية بلادي واصلي
إدعوا بصوتٍ يغرق الدنيا مهابة و ابتهال
عاش الملك سلمان بن عبدالعزيز الفيصلي
الشاعر مشعل الضوي
(
(
