ياصاحبي قبل الخطأ جيت أعاتبك
والاّ السبب ماني مفتّش خفاياه
ماني على كبوة حصانك محاسبك
جفّ القليب اللي وردنا على ماه
لاتقطع حبال الوفا دون صاحبك
ترى الوفا مايتعب الحر ممشاه
وان شفت خله فالعرب ماتناسبك
لاتكشف اسرار العباد المغطاه
لاقالوا الاجواد تكرم شواربك
هرج الردي مافيه داعي تقصّاه
لايعجبك صوت المغرد ويطربك
بعض الطيور بصوت تغريده بكاه
ياوارد الماء لاتغثبر مشاربك
وتصير مثل اللي كحل عينه اعماه
قبل الهواجس في منامك تعذبك
لاترفع النيشان عن صوب مرماه
درب الخطا في زحمة الكون ينشبك
ومن لايعينك ماتبيله مداراه
في محكمة دنياك نوّخ ركايبك
واطلب من اللي يغفر الذنب رحماه
(
(
التعليقات 2
2 pings
سلطان عليان الحربي
16/04/2019 في 6:32 م[3] رابط التعليق
صح السان يابو ماجد
غير معروف
16/04/2019 في 9:41 م[3] رابط التعليق
صح اللسانك