علمن لفاني ضيق الصدر طاريه
جابه لي الجوال نقال الاخبار
علم الرفيق اللي نعزه ونغليه
قالو وافاه الموت قصاف الاعمار
والعين هلت دمعها غصب تبكيه
دمعة حزن هلت مثل وبل الامطار
والحزن في قلبي كما النار يكويه
داخل فؤادي يلتهب واهج النار
لو العمر يهدا علا الناس لهديه
علا ابو فهد مكرم الضيف والجار
مرحوم يارجلن تشرف مباديه
مرحوم يانسل الصناديد الاحرار
كم موقفن غصاب لاقام يحميه
مجرّي الهيّاب مع درب الاخطار
كم عايلن يخطي طريقه يقديه
عز الرفيق وكيد بنحور الاشرار
علا الوفا والطيب دايم مساعيه
قول وفعل ماهي سواليف هذار
راعي حميه لابته تفتخر فيه
يقدم ليامنه هبا ميت النار
كل الصفات الطيبه تنوجد فيه
يسرج خيول الطيب في كل مضمار
ابو فهد كل المطاليق تنعيه
اقفا ولا باقي سوا طيب الاذكار
وانا اعرف انه حق دربن مشا فيه
والحي ماله غير هالدرب معبار
والادمي عمره محدد وتاليه
لابد يوم ايغيب عن شوف الانضار
بامر العزيز اللي يميته ويحييه
جل وتعالى الخالق النافع الضار
عليم مابالكون جهره وخافيه
ندعوك يالمعبود في سر وجهار
يالله ياسامع دعا من يناجيه
يالله عسا روحه ماتعرض علا النار
مع الصحابه والنبيين تؤويه
في جنة الفردوس من ضمن الابرار
الشاعر/
ضاري فلاح الحمرون
(
(
