الشعر في حفل تكريمك ياسالم بشّر
نفسه بتكريمه وْكلّ العرب بشّرها
والعرب كانت تهنّي بعض وأيضاً تفخر
لا انتجت خيل أو ولِد طفل أو نبغ شاعرها
وْتوقد النيران من فوق الجبال وْتسهر
احتفال بمن لفاها بأرضها وْنوّرها
وأنت نابغْة الشعر والشاعر اللي يزخر
بالمعاني والبيوت الندّر تسخّرها
بالمعاني كنّك لحالك بوادي عبقر
وْلا دخلت بعمقها تتوغّل بعبقرها
أنت سيفٍ ذاخرينه للنهار الأغبر
سيف عبس القاطع اللي سيرته عطّرها
وأنت لامنّك شهرت السيف كنّك عنتر
والمعارك ماتبي غير أنت ياعنترها
والأماسي شوقها لك كلّ يومٍ يكبر
وْلايخف الشوق لينك تعتلي منبرها
والمنابر لا صهلت بْها يانبض المنبر
تقل تلبسها ثياب العيد وتبخّرها
والصفوف ان غبت عنها من الوله ماتصبر
وأنت حتى بغيبتك تشتاق وتدّوّرها
والشعر دولة غنيّة منك وأنت القيصر
من لها بعدك خليفة عرش ياقيصرها
افرح احبابك وواصل في طريقك واعبر
البحور السبع وامواج البحور اعبرها
وانثر ابداعك هنا وهناك وابدع وامطر
المسامع في لحنك العذب يامزهرها
الوكاد انّ الشعر بالحفل هذا بشّر
نفسه بتكريمه وْكلّ العرب بشّرها

عبدالله عوجان