ألف اولف من صحيح التجاريب
ماهو خيالً نبعثه بالمكاتيب
مالي عن الهاجس جناح و مجانيب
بدت علي بقعاء وهي ما بعد جات
الباء بديت بذكر خلاق الاكوان
منشي السحايب و المزون ام هتان
محيي الهشيم البايده عقب ماكان
جرهد و تلفحه السموم اللهيبات
التاء تليت الذكر بأزكى صلاتي
على نبياً تمم الصالحاتي
مكارم الأخلاق و البيناتي
ايات من وحيً نزل من سموات
الثاء ثمر عمري جنيته بالأنشاب
أبسط حقوقي بين طالب و طلاب
بير العرب حثرب على كل شراب
غير الذي حَرف بأحاديث و ايات
الجيم جاني من ثمرها المكارم
لاني بمكفولً ولاني بغارم
صارم و رباني من الوقت صارم
اخذت فيه من التجاريب صكات
الحاء حلمت وكل ما احلم فجعني
من عز حلمي واقعً ما نصفني
دنيا وَهم نبني ولا كن نبني
تصبر و ابعطيك الحكم بالعبارات
الخا خيالي ما تعدا. حدوده
مثلي مكانه من مراتب جدوده
مير الزمان اللي تبّين جحوده
يعطي هل الربق الشيّم و الوجاهات
الدال درب العز يا من يدله
المال واجد و الهقاوي مذله
في منزل ماهو ترا منزلً له
يجر بشته و الهقاوي صغيرات
الذال ذربين الخصال الاجاويد
خاويتهم و ارقبت في نايف الحيد
حشمت نفسي عن جناب الهلاميد
خل الحسد يفعل بها فعل نحات
الراء رقابً عوج ما تعدل الميل
يا مرتجيها وكل الله تساهيل
تعيل لو ناصحتها ترجع تعيل
بتخالفك لو هو بفرض الصلوات
الزاء زمانك ما يجي لك على الكيف
ولا ينفع الرجال كثر التحاسيف
يا حيف رددها ولو قلت يا حيف
ما يحترك ميّت شعوره و لا مات
السين سريتك بهرجي و ضريت
ما ينفعك ما فات لو قلت يا ليت
لا تشتم الحاضر و تندب على الميت
هاذي سوات الوقت مابه مساوات
الشين شاركت العواريف بالراي
و حاورت منهم كل دارس و قراي
ما كل من ميل على السوق شراي
ناسً تظاهر بالولاء بالمقالات
الصاد صاحب من خيار الزحازيح
رجّال في قربه فلا والله اتطيح
اخير لك من هقوةً ما لها ضيح
غابت مع الاموات في ماضيً فات
الضاد ضدك لو حجاجه مهلي
في قصر ماله يا ابيض الوجه ظلي
يفرح ليا زليت لو ما تزلي
ويمحق ليا من جبت راس الطويلات
الطاء طبوع الناس ماهي خفيه
صاحبك تعرف نيته ويش نيه
من عشرته و الناس ماهي غبيه
لا طالت الرفقه كشف محور الذات
الظاء ظلم حظه من يجامل الناس
ترا المجامل له قوانين و قياس
عد الصحيح ولو على ذبة الراس
ولا يرتفع راسً يبوق الجمالات
العين عينت الدجل و الحياله
كلً مورثها لباقي عياله
عفن الطبوع المستضيق بخياله
شحيح عرف و للعواريف شمات
الغين غبنك يا صحيبي على اللاش
ناسً تصر المال فبنوك و خياش
ماهي بحالك لا تنومس على ماش
المال ما يشري قلوبً بصيرات
الفاء فقير المرجله لو ملك مال
ما يشتري عِزه ولا يورث عيال
لو تنهضه للطيب يشناك بريال
الأسم واحد و البيوت مخبورات
القاف قَفت بالرجال المنايا
ما باقي الا ذا النَقد و الزرايا
محصور بين المختصر و الزويا
يشذب من اعراض البشر ثم يقتات
الكاف كينونة جسد مالها روح
لا مذهبً واضح ولا رأي مشروح
مذبوح من غبني ولاني مذبوح
اجساد مجتمعه تفاكيرها شتات
اللام لو هي في زمان الحرايب
يبين من يصطا و من كان هايب
لكن هذا هو زمان الغرايب
تِظهر به الاذناب زيف المروات
الميم مرضو يا عسى الله يشافي
اهل النفوس الهايفات الضعافي
شيوخ طلً ولا عليكم خلافي
الله يشافيكم عساها سلامات
النون ناصرني من الله يقيني
لو كنت شامت بالردى يبتليني
ولاني بحاسد معطي الله يميني
مالً وجاه وجد حاز البطولات
الهاء هني اللي عن الوقت سالي
ما سرمدنه مجهمات الليالي
يهجع قرير من اقشر الهم خالي
يرخي هدب عين التفاكير و يبات
الواو وكلت المعاسير لله
يجيب من في وحشة الليل ناجاه
حاجات عبده لأعتزا فيه معطاه
ما تذل له غير النفوس الجليلات
الياء يطيب القول و الاختتامي
بأزكى تحيه مع جميل السلامي
على رجالً ما تحَرف الكلامي
تحفظ حقوق وتأخذ الحق بأثبات
الشاعر / عبدالرحمن خلف الضميني
