“الحظ عاثر” للشاعر:وليد الغريبي

يالله يامن هو ليا منك اعطيت
انت الكريم الي عطاك الجزيله

تعطي بلامنه ولا يوم شكيت
بان الفرج يقفى الهموم الثقيله

وانا ادري اني في حياتي تماديت
من زود ذنب اقترفته واشيله

واستغفر الرحمن عن كل ماخطيت
الواحد الي كلنا نشتكيله

اشكي عليك الحال يامحيي الميت
عجزت اعسف احلامي المستحيله

ياكم من الاحلام عشت وتمنيت
والحظ عاثر والليالي مهيله

كثر التمني والحسافه وياليت
مازين المقسوم واربى حصيله

واليا غزى قلبي من الهم جريت
صوت ينبه كل نايم عويله

مسكين ياحي من الحب عانيت
الحب ثورة والمشاعر فتيله

ماباقي الايشعل الشوق توقيت
ويهيم في عشقه نهاره وليله

ياما نهيت النفس لكني ازريت
وراعي الهوى يقلون قلبه دليله

والنفس اصارعها ولوني تعنيت
امارة بالسوء تجني الرذيله

يانفس انا من سكة الغي مليت
توبي وعودي للتقى والفضيله

علّي على مانا نويت وتهقويت
تسعفني اقداري واروم الطويله

والناس امانيها على كف عفريت
لو لك مع اهل الختم منهج وحيله

واليا زهمت ازهم على ذايع الصيت
دور على صالح ولا ابغى بديله

الي يورد غايتي كانك اوحيت
عنده خبر علمي وعنده عميله

الكبتن الي ماكره قصر تكريت
يامر وينهى والخلايق تجي له

واهل الوفا ماظنتي تهدم البيت
الي على مبنى وتبقى اصيله

وعزالله اني كل مااصبحت وامسيت
غير الوفا ماهمني والجميله