خلاصة تجاريب

خلاصة تجاريب
http://adwaalwatan.com/?p=3131102
الزيارات: 29848
التعليقات: 0
يا علي خذ مني خلاصة تجاريب
سجل على الطرس النظيف اعترافي
عن حالة الدنيا و حال الأصاحيب
أعطيك تقريراً مفصل  وافي
من قبل تنبت لحية(ن) نصها شيب
إلى اليوم ما خفّي عليك انت خافي
و قبل أبتدي ما أقول  ما بي عذاريب
أنا بشر لكن عسى الستر ضافي
و أنبيك عن سيرة حياتي بترتيب
من دون نقص و زود(ن) إضافي
عقدين من عمري مزوح و تعاجيب
لا شلت هم و لا حسبت لقوافي
أما ثلاث عقود تعذيب تأديب
أحيان شربي كدر و أحيان صافي
و رافقت بالطرقه جماعه و أجانيب
اثنين قدامي و عشرة خلافي
رحلة عمر يخطي بها الرمي و يصيب
و أنا ماني حرص(ن) على الإكتشافي
أصد عنها دام ليه مجانيب
ما أحرج رفيقي بالأمور العوافي
و يوم الليالي غثربن المشاريب
و جاء واجب الشرهه عرفت الملافي
كشفت خلان الرخاء و الأكاذيب
و أهل الوفاء بآخر نهاية مطافي
فالماقف اللي يقطع الشك و الريب
و عند النشاما ما عليه اختلافي
يطلعله اللي عادته يدرك الطيب
و يصد عنه اللي جنوبه صخافي
ما فيه خير و ينقصه حسن أساليب
لا أوحيت منطوقه تعافه عيافي
و لولي أداري هرج بعض الزواريب
سميت كل اللي ذكرته بقافي
ما دام فيه لكل شيئ(ن) تسابيب
كلن على فعله يبي له مكافي
رد الثناء واجب و غط الثناء عيب
للدين و أعراف القبايل منافي
و مجامل اللي يسهجون المواجيب
يراه عباد الوجيه أحترافي
و أنا بعرفي مالها غير تعريب
خصلة نفاق(ن) تمتهنها ضعافي
رأيي و أنا مالي بحبله مقاضيب
من فضل من لا أرجي غيره و أخافي
و أوصيك يالنادر عريب المجاذيب
في طاعة الله و احذر الأنجرافي
وراء الهوى و النفس و اللي بهم ريب
بياعة السمعه طيور الهوافي
و في كل حال أحسب حساب العواقيب
و عما يريبك لك وساع الفيافي
و بالعقل و الحكمة للأخلاق تهذيب
و الصبر ميزاته ذكرها النصافي
و اللي على الرجال فيهن مناقيب
أنبيك عنهن و أنت أخبرك سنافي
الكذب و النمه و شذب العراقيب
و البخل دايم ضوء راعيه طافي
و احذر من الشكه و قرب المحاضيب
ينقدنك بالرفيق المصافي
و خلك لبيب و خل عندك صفة ذيب
قافيك درس المقبلات المقافي
منها استفيد و كل شيىء(ن) مكاتيب
عساه ما يكتب عليك الخلافي
ووفقك من  يعطى التوافيق توهيب
المستجيب لمن دعاه المشافي
الواحد اللي يعلم السر و الغيب
اللي عليه اليا توكلت كافي

التعليقات (٠) اضف تعليق

اضف تعليق

بريدك الالكترونى لن نقوم بأستخدامه.

You may use these HTML tags and attributes:
<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>